Lukas 4

Hyang Yesus Kagoda olih Ratun Para Setane

Sasampune Hyang Yesus kalukat, Ida matilar saking Tukad Yordane. Irika Ida kaebekin olih sane nuntun Ida nuju genah sane bengang linggah. 2 Irika Hyang Yesus kagoda olih para setane petang dasa (40) dina suene. Duk punika Hyang Yesus mapuasa, nenten ngajeng napi-napi. Punika mawinan Ida meled pisan ngajeng.

3 Raris ratun para setane ngraos ring Hyang Yesus sapuniki, “Yening saja Ragane Putran , tunden ja batune ene apang dadi dadaaran!”

4 Irika raris Hyang Yesus ngandika sekadi puniki, “Ada katulis di kene, ‘Manusane nenten ja maurip ulian ajengan kamanten.’” Pengeling-eling 8:3.

5 Raris ratun para setane ngajak Hyang Yesus ka genah sane tegeh. Irika ipun gelis ngedengang makasami karajaan ring jagate kapining Ida. 6 Tur ratun para setane matur ring Hyang Yesus sapuniki, “Makejang kuasa lan kasugihane ene bakal serahang tiang sid Ragane krana makejang ento suba kaserahang sid tiange. Kuasa lan kasugihan ento bakal serahang tiang tekening nyen ja manut sakita keneh tiange. 7 Makejang ento bakal dadi gelah Ragane, yening Ragane matimpuh saha nyembah tiang.”

8 Irika raris Hyang Yesus ngandika sapuniki, “Ada katulis di Cakepan Sucine kene, ‘Sembah ja Sang Hyang Pengardi, Sasembahan Tunggal ragane. Ida kamanten sane sapatutne ayahin ragane.’” Pengeling-eling 6:13.

9 Raris ratun para setane ngajak Hyang Yesus ka Yerusalem, ka duur muncuk Genah Agung Mabakti kapining Sang Hyang Pengardi. Irika raris ratun para setane matur sapuniki, “Yening saja Ragane Putran Sang Hyang Pengardi, macebur ja uli dini. 10 Krana ada katulis di Cakepan Sucine kene: ‘Sang Hyang Pengardi jagi mrentahang para Idane mangda nyaga Ragane.’ 11 Irika taler katulis, ‘Para malekate jagi nyambut Ragane nganggen tangannyane mangda cokor Ragane nenten sengkala keni batu neng akidik.’” Kidung 91:11-12.

Gambar: Hyang Yesus lan ratun para setane ring duur Genah Agung mabaktine (4:11)

12 Raris Hyang Yesus ngandika sekadi puniki, “Ada sabda kene, ‘Sampunang ja ragane nguji Sang Hyang Pengardi, Sasembahan Tunggal ragane.’” Pengeling-eling 6:16.

13 Sasampune ratun para setane wusan ngoda Hyang Yesus nganggen sekancan daya upaya, raris ipun matilar. Nanging ipun ngrereh galah sane becik mangda prasida ngoda Ida malih.

Hyang Yesus Mawali ka Galilea

14 Sasampune Hyang Yesus kagoda, Ida raris mawali ka Wawidangan Galilea. Ida kakuasain olih Roh Sang Hyang Pengardi. Irika raris orti indik Hyang Yesus kasub ring sekancan wawidangane punika. 15 Lan Hyang Yesus ngajahin ring , tur irika anake sami ngagungang Ida.

Hyang Yesus Nenten Katerima ring Kotan Idane

16 Raris, Hyang Yesus lunga ka Kota Nasaret, genah Idane kelih. Ring rahina Sabat, sekadi biasane Ida lunga ka bale wantilan agama Yahudine. Irika Ida ngadeg jagi ngwacen Cakepan Sucine. 17 Ida kaaturin cakepan sane katulis idumun olih Sang Hyang Pengardine sane mapesengan Yesaya. Raris Ida mukak cakepane punika saha manggihin trawangan sane ngamaosang sekadi puniki,

18 “Roh Sang Hyang Tunggal nyarengin Tiang,

krana Tiang sampun kalantik olih Ida,

mangda ngortiang ring anake tiwas.

Tur Ida sampun ngutus Tiang mangdane Tiang ngortiang

indik kabebasan kapining anak sane kakrangkeng ring buine,

tur indik kasegeran kapining anak sane buta.

Kenten pada, Ida sampun ngutus Tiang mangdane mebasang anake sane kajajah,

19 saha ngortiang indik rauhnyane galah saking .” Yesaya 61:1-2.

20 Wusan ngwacen, Hyang Yesus ngulung cakepane punika tur nyerahang ring pengayah bale wantilane irika. Raris Ida malinggih. Makasami anake sane wenten irika pada nlektekin Ida. 21 Irika raris Hyang Yesus ngawitin ngandika ring anake akeh sapuniki, “Dinane mangkin, duk ragane mirengin Tiang, trawangan saking cakepane punika mamargi.”

22 Anake sami ngraosang sane becik indik Hyang Yesus. Tur ipun sami angob krana baos Idane luih pisan. Raris ipun sami mataken sapuniki, “Ngudake pianakne I Yusup bisa ngajahin buka kene?”

23 Raris Hyang Yesus ngandika ring ipun sami sapuniki, “Pastika ragane jagi ngamaosang sasonggane puniki: ‘Wih jero dokter, segerin ja dumun ragan jerone.’ Baose punika maarti ragane makeneh sekadi puniki: ‘Laksanayang ja driki di kotan Ragane, paindikane sami sane pirengin tiang sane mamargi ring Kota Kapernaum!’” 24 Malih Ida ngandika sapuniki, “Tiang ngandikayang sane patut, nenten wenten sinoman Sang Hyang Pengardi sane kaajiang ring kotannyane praragan. 25 Pengandikan Tiange puniki patut! Ring jaman dane , inggih punika sinoman Sang Hyang Pengardine idumun, tanahe nenten ngasilang napi-napi krana nenten wenten sabeh kantos telung tiban tengah suene. Duk punika wenten pada akeh anak janda sane kakirangan ajengan ring negerine puniki. 26 Yadiastun sekadi punika, Sang Hyang Pengardi nenten ngutus Sinoman Elia mangda luas mrika sid salah tunggal jandane sane wenten ring . Nanging dane wantah kautus nulungin anak janda ring Desa Sarpat Wawidangan Sidon mangda ngamolihang ajengan. 27 Turmaning ring jaman dane Elisa, inggih punika sinoman Sang Hyang Pengardine idumun, akeh wenten anak ring Negeri Israel sane keni penyakit kusta, nanging nenten wenten sane kasegerin. Wantah dane Naaman anak saking Negeri Siria kamanten sane kasegerin.”

28 Mirengin pengandikan Idane sekadi punika, raris anake sane wenten ring bale wantilane dados gedeg pisan. 29 Ipun sami matangi raris nundung Hyang Yesus saking kotane punika. Ipun makta Ida ka sisin abingan gununge genah kotane punika kawangun, mangda prasida nuludang Ida ka pangkunge. 30 Nanging Hyang Yesus mamargi ngliwatin ipun sami raris luas.

Hyang Yesus Nyegerin Anake sane Karangsukin Buta Kala

31 Raris, Hyang Yesus mamargi ka Kota Kapernaum Wawidangan Galileane. Ritatkala rahina Sabat, Ida ngajahin ring bale wantilan agama Yahudine. 32 Anake sane wenten irika angob nyaksiang caran Idane ngajahin krana pengajahan Idane madaging kuasa.

33 Irika ring bale wantilan agama Yahudine, wenten anak lanang sane karangsukin . Buta kalane punika keras nyerit, 34 “Yesus uling Nasaret, eda ja ngugul icang ajak makejang. Apake Ragane teka bakal menyahang icang makejang? Icang nawang nyen sasajane Ragane: Ragane tusing ada len Utusan suci saking Sang Hyang Pengardi.”

35 Raris, Hyang Yesus namprat buta kalane punika sapuniki, “Siep ja iba! Pesu ja iba uling anake ene!” Irika raris buta kalane mantigang anake punika ka tengah-tengah anake akeh tur magedi tanpa ngendahang ipun.

36 Makasami anake pada angob lan saling ngraos sapuniki, “Pih, apake isin pengajahane ene? Gede sajan kawibawan lan kuasan Gurune! Buta kalane katunden magedi; prajani buta kalane ento magedi.” 37 Lan orti indik Hyang Yesus kasub ring saluirin wawidangane punika.

Hyang Yesus Nyegerin Anake Akeh

38 Raris Hyang Yesus matilar saking bale wantilan agama Yahudine, tur Ida nuju umah I Simone, inggih punika salah tunggal sisian Hyang Yesuse. Duk punika, matuan I Simone sedek sungkan panes sanget, lan anake sane wenten irika nunas tulung ring Hyang Yesus. 39 Raris Hyang Yesus ngranjing tur ngadeg ring sisin pasarean matuan I Simone. Irika Ida nundung penyakitnyane mangda ical, lan penyakitnyane ical. Tur pramangkin matuan I Simone matangi ngayahin tamiune makasami.

40 Ritatkala engseb surya, makasami anake sane sungkan magenepan kabakta ring Hyang Yesus. Ida raris ngusud makasami anake sane kabakta mrika, tur suang-suang ipun dados kenak. 41 Ritatkala punika, roh-roh kalane wetu saking anake akeh saha majerit-jerit, “Ragane tusing ada len Putran Sang Hyang Pengardi.” Nanging Hyang Yesus nengkikin lan nenten ngicen ipun sami ngraos krana ipun uning yening Ida nenten tios sane Kajanjiang.

Hyang Yesus Kautus Mangda Ngortiang Orti Rahayu

42 Benjang semengane, Hyang Yesus matilar saking kotane punika nuju genah sane sepi, nanging anake akeh ngrereh Ida. Ritatkala manggihin Hyang Yesus, ipun ngutsahayang mangdane Hyang Yesus nenten matilar saking ipun sami. 43 Nanging Hyang Yesus ngandika, “Nenten ja sekadi punika. Tiang kautus olih Sang Hyang Pengardi mangda tiang taler mamargi ka kota-kota sane lianan. Tiang musti ngortiang Orti Rahayu indik ring jagate.” 44 Punika mawinan Hyang Yesus ngortiang Orti Rahayu ring bale wantilan agama Yahudi ring saluirin jagat Yudeane punika.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”